Stuðningur við hryðjuverk dvínar

Stuðningur við Osama bin Laden og árásir gegn Bandaríkjamönnum og bandamönnum þeirra í Írak fer mjög dvínandi í múslimaríkjum heimsins, sérstaklega þeim sem hafa sjálf orðið fyrir árásum hryðjuverkamanna. Bandaríska Pew-rannsóknarstofnunin greindi frá niðurstöðum nýrrar skoðanakönnunar sem hún lét gera í 17 ríkjum, þar á meðal sex ríkjum þar sem múslimar eru í meirihluta. Í Líbanon hefur þeim sem telja réttlætanlegt að beita hryðjuverkum til varnar íslam fækkað úr 73 prósentum sumarið 2002 í 39 prósent nú. Svipaða sögu er að segja af Marokkóum, Pakistönum og Indónesum en aftur á móti telja fleiri Jórdanir nú en áður að ofbeldi sé réttlætanlegt. Þá hefur hylli Osama bin Laden, leiðtoga al-Kaída, minnkað í Líbanon, Indónesíu, Tyrklandi og Marokkó en þau hafa á síðustu misserum orðið fyrir hryðjuverkaárásum. Í öllum löndunum nema Jórdaníu töldu aðspurðir að mikilvægi íslam í stjórnmálum hefði vaxið undanfarin misseri. Ýmsar ástæður eru nefndar fyrir stuðningi við róttækar baráttuaðferðir. Fátækt og atvinnuleysi voru efst á listanum í sumum löndum, í öðrum nefndu menn utanríkisstefnu Bandaríkjamanna.