Skemmtanahaldi frestað

Slökkvistarfi í flugeldasölu hjálparsveitar skáta í Hveragerði er nú að ljúka en ljóst er að tjón af völdum eldsvoðans er mikið. Stór hluti búnaðar hjálparsveitarinnar er ónýtur og þá urðu miklar skemmdir á verkstæði við hlið flugeldasölunnar. Ný grafa sem var þar inni er ónýt. Opinberu skemmtanahaldi, þar með talið áramótabrennu Hvergerðinga, hefur verið frestað.

Nú þykir ljóst að neisti hljóp úr heftibyssu í kveikiþráð flugelda en verið var að undirbúa flugeldasýningu fyrir kvöldið. Fulltrúar frá Slysavarnafélaginu Landsbjörgu voru í Hveragerði síðdegis og fóru yfir málin með heimamönnum. Mesta mildi þykir að ekki fór verr. Einn maður brákaðist á fæti þegar fólk hljóp út úr flugeldasölunni en rúmur tugur manna var inni þegar eldurinn kom upp.

Flugeldalager sem í húsinu var slapp en hann var í tryggri geymslu handan við eldvarnavegg.