Samþykkja að fella útflutningsstyrki niður

Fulltrúar allra 149 aðildarríkja Alþjóða viðskiptastofnunarinnar samþykktu fyrir stundu samkomulag sem heldur lífi í viðræðum um aukið frjálsræði í verslun með landbúnaðarafurðir.

Samkvæmt því verða útflutningsstyrkir í landbúnaði lagðir af ekki síðar en í árslok 2013 og útflutningsstyrkir til bómullarframleiðenda verða lagðir af á næsta ári.

Þetta er nokkuð minna en forystumenn þróunarríkja og vanþróaðra ríkja vonuðust eftir en þeir lýstu engu að síður ánægju með að þó þetta mikill árangur hefði náðst. Einnig náðist samkomulag um að ljúka núverandi samningalotu Alþjóða viðskiptastofnunarinnar á fyrri hluta næsta árs en hún hefur nú staðið yfir í fjögur ár.