Vilja evrópska fuglaflensunefnd

Fuglaflensa hefur greinst í Grikklandi og beðið er niðurstöðu rannsókna á sýnum úr dauðum farfuglum í Króatíu. Sérfræðingar telja núna ómögulegt að koma í veg fyrir að flensan breiðist út um Evrópu, en markmiðið er að hindra að menn smitist af henni. Flensan mjakast nú til vesturs, eftir að hafa fundist í Tyrklandi og Rúmeníu. Grikkland bættist í hópinn í dag og Króatía gæti verið næst. Fólk er beðið um að halda ró sinni, en sérfræðingar minna um leið á að yfirvöldum beri skylda til að grípa til allra viðeigandi varúðarráðstafana. ESWI, samtök fjórtán alþjóðlegra vísindastofnana og sjö lyfjafyrirtækja funduðu um málið í dag og þar kom fram að full þörf væri á að mynda fuglaflensustarfshóp. Þótt mörg lönd hafi þegar sankað að sér bóluefnisbirgðum gegn inflúensu, þá er enn ekkert bóluefni til sem getur komið í veg fyrir smit úr fuglum í menn. Nú er líkt og menn haldi niðri í sér andanum, því enginn vill vera ásakaður um óþarfa dómsdagsspár og það að hræða borgarana að óþörfu - eins og er hafa einungis um sextíu manns látist úr fuglaflensu. Á hinn bóginn vilja stjórnmálamenn heldur ekki bera ábyrgð á því að hafa hunsað vísbendingar um yfirvofandi faraldur, ef hann brytist nú út. Á fundinum sagði einn fundarmaður að líkja mætti þessum faraldri við hryðjuverkárás og hann hvatti til þess að farið yrði varlega og að yfirvöld verði að grípa til viðeigandi aðgerða.