Einn öflugasti skjálfti sögunnar

Skjálftinn mældist 7,6 stig á Richter og átti upptök sín um áttatíu kílómetra norðnorðaustur af höfuðborg Pakistans, Islamabad. Klukkan var að nálgast níu í morgun að staðartíma þegar hann reið yfir og því margir heimavið. Pakistanski hluti Kasmírhéraðs virðist hafa orðið verst úti, en þar þurrkuðust heilu þorpin hreinlega út. "Tjónið er mest í fjallahéruðum þar sem skriðuföll urðu og húsin voru aðallega úr leir eða öðru óvönduðu efni. Á vissum svæðum hafa heilu þorpin hrunið og heilu bæirnir horfið," sagði Shauket Sultan, talsmaður pakistanska hersins. Ljóst er að marga daga mun taka að meta nákvæmlega hversu mikið tjónið er, en það er gríðarlegt, bæði manntjón og eignatjón. Erfiðar samgöngur og fjarskipi hamla hjálparstarfi nokkuð, mörg þorp eru algerlega sambandslaus við umheiminn en herinn hefur sent þyrlur á vettvang til að koma hjálpargögnum til þurfandi. Sjúkrahús eru yfirfull af slösuðu fólki og fólki sem leitar ástvina sinna. Jarðskjálftar eru tíðir á þessum slóðum, þar sem eru flekamót Indlandsflekans og Evrasíuflekans. Jón Gunnarsson, formaður Landsbjargar segir að vel hafi verið fylgst með gangi mála frá því seint í nótt og þegar hafi verið sett tilkynning inn á samskiptavef alþjóðlegra björgunarsveita um að íslenska sveitin sé reiðubúin að halda til hjálparstarfa um leið og þess sé óskað. Imrahim Hussein er starfsmaður Rauða hálfmánans í Islamabad og fann svo sannarlega fyrir skjálftanum í nótt. "Í einu hverfinu hrundu tvær íbúðarblokkir. Um 200 til 300 manns grófust í rústunum. Brakið var á hæð við þriggja hæða hús," sagði Hussein. Hann segist ekki viss um að óskað verði eftir alþjóðlegri aðstoð - fyrst um sinn verði sá búnaður notaður sem til sé á svæðinu.