Tugþúsundir lyfjaskammta sendir

Ástralar munu gefa Indónesum 50 þúsund skammta af lyfinu Tamilflu til þess að hjálpa þeim að berjast við fuglaflensu sem þegar hefur dregið sex manns til dauða í Indónesíu. Fuglaflensa hefur nú fundist í fiðurfénaði í tveimur þriðju af héruðum Indónesíu. Auk þeirra sex sem hafa látist eru á annan tug manna á sjúkrahúsi með einkenni sem svipar til einkenna veikinnar. Vonast er til að lyfið nýtist í baráttunni gegn sjúkdómnum. Alþjóðaheilbrigðismálastofnunin mun sjá um að dreifa lyfjunum þannig að hættan á því að veiran breiðist frekar út sé sem minnst.