Nota bökunarolíu í stað bensíns

Nokkrir ökumenn í Kaliforníu hafa gripið til heldur nýstárlegra leiða til að mæta háu eldsneytisverði í Bandaríkjunum. Í stað þess að fylla bílinn af bensíni og tæma um leið budduna hefur hópur manna um nokkurt skeið notað bökunarolíu á tankinn með góðum árangri. Sérfræðingar í bílamálum vita kannski að upphaflega voru díselvélar hannaðar til að ganga fyrir hnetuolíu en ekki díselolíu. Nú á dögum þarf hins vegar smá kúnstir til að láta dæmið ganga upp. En ef notaðar eru sérstakar slöngur, stærri eldsneytissía og forhitari virðist hægt að komast af með bökunarolíu og spara í leiðinni offjár.