Fyrirhuguð heimsókn vekur furðu

Hosni Mubarak, forseti Egyptalands, ætlar í opinbera heimsókn til Ísraels síðar á árinu. Þetta hefur Reuters-fréttastofan eftir ísraelskum útvarpsstöðvum. Þetta þykir sæta miklum tíðindum, því samskipti Egyptalands og Ísraels hafa verið með stirðara móti undanfarin ár. Þau bötnuðu nokkuð eftir að Egyptar höfðu milligöngu um vopnahléssamninga milli Ísraels og Palestínumanna og brottflutning gyðinga frá landnemabyggðum sem fylgdi í kjölfarið. Eftir því sem næst verður komist mun Mubarak heimsækja Ariel Sharon, forsætisráðherra Ísraels, á búgarð hans í suðurhluta landsins, í byrjun desember, en egypskir embættismenn hafa ekki viljað staðfesta fregnirnar enn.