Fjórtán látnir í eldsvoða í París

Að minnsta kosti fjórtán létust, þar af þrjú börn, í enn einum eldsvoðanum í Frakklandi í gærkvöld. Meira en sextíu manns hafa látið lífið í brunum þar frá því í apríl. Byggingin er átján hæða, íbúðirnar eru 110 og íbúarnir um 800. Hún er í Val-de-Marne héraði skammt suður af París. Talið er víst að kveikt hafi verið í byggingunni því vitni bera að þau hafi séð hóp unglinga sem bjuggu í húsinu hlaupa af vettvangi skömmu áður en eldurinn braust út í anddyri hússins, líklega í póstkassa eða -kössum. Slökkviliðið sagði slökkvistarf hafa gengið vel, en fjórtán manns létu samt lífið úr reykeitrun og fleiri eru í lífshættu. Þetta er fjórði eldsvoðinn í París eða nágrenni hennar, þar sem hópur fólks ferst, á fjórum mánuðum. Þar af hafa þrír þeirra orðið á síðasta hálfa mánuðinum. Flest fórnarlambanna hafa verið innflytjendur af afrískum uppruna, sem bjuggu í niðurníddu húsnæði án nokkurra eldvarna, en byggingin sem brann í gærkvöld hafði nýlega verið gerð upp og voru íbúðirnar leigðar út til skjólstæðinga Félagsmálastofnunar. Ekki er talið að nein bein tengsl séu á milli eldsvoðanna. Mikil umræða hefur verið um aðbúnað innflytjenda og eldvarnir í kjölfar alls þessa en 300 þúsund manns bíða þess að komast í varanlegt húsnæði á Parísarsvæðinu.