Vona að fjarskiptum sé um að kenna

Bróðir Lilju Ólafsdóttur Hansch, sem saknað er eftir fellibylinn Katrínu, segist vona að ekkert verra en slæmt fjarskiptasamband valdi því að fjölskyldan hafi ekki enn heyrt frá henni. Lilja var að tala í síma við systur sína á Íslandi, Helgu Hrönn Ólafsdóttir, þegar fellibylurinn gekk yfir. Þá rofnaði símsamband og síðan hefur fjölskyldan ekki heyrt frá henni. Jakob Ólafsson, bróðir Lilju, sem er flugmaður hjá Landhelgisgæslunni, segir að þau voni að sambandsleysi í fjarskiptum valdi því að þau hafi ekki heyrt frá henni. Lilja býr í Gulfport í Missisippi, og einmitt þangað hafa starfsmenn Landhelgisgæslunnar farið í sjómælingaskóla. Jakob hefur notfært sér þau tengsl til þess að fá menn við til að leita Lilju. Ef það ber ekki árangur íhugar hann að fara sjálfur á staðinn.