Hafa boðið aðstoð rústasveitar

Neyðaraðstoð er loks farin að berast í nokkrum mæli til New Orleans, á sjötta degi eftir að fellibylurinn Katrín lagði hana í rúst. Skipulag neyðaraðstoðar er harðlega gagnrýnt og er alríkisstjórnin sökuð um kynþáttamismunun. Íslensk stjórnvöld hafa boðið fram aðstoð Alþjóðarústabjörgunarsveitarinnar og var sveitin sett í viðbragðsstöðu í gær. Tugþúsundir íbúa New Orleans sem hafa beðið dögum saman eftir aðstoð fögnuðu þjóðvarðliðum sem komu til borgarinnar í gær með vistir og vopn til að koma á lögum og reglu í borginni á ný. Gleðin var þó trega blandin þar sem reiðin kraumar í fólki vegna seinagangs yfirvalda. Sérfræðingar höfðu spáð nokkuð nákvæmlega fyrir um hvaða afleiðingar fellibylurinn hefði og því þykir undirbúningur neyðaraðstoðarinnar í kjölfarið hafa verið algert klúður. Um milljón manns yfirgaf borgina áður en fellibylurinn skall á að áeggjan yfirvalda en stór hluti íbúanna er fátækur og hafði hreinlega ekki efni á því að koma sér burt. Hipphopparinn Kayne West úthrópaði alríkisstjórnina á góðgerðasamkomu í gær og hélt því fram að kynþáttafordómar hefðu ráðið því hversu seint björgunaraðgerðir hefðu farið af stað. Íbúar New Orleans hafa tekið undir þetta, en tveir þriðju hlutar þeirra eru svartir. George Bush Bandaríkjaforseti heimsótti Alabama og Mississippi í gær og flaug yfir New Orleans í þyrlu. Hann viðurkenndi að neyðaraðstoð á hamfarasvæðunum hefði ekki verið nógu góð þessa fyrstu daga og lofaði bót og betrun. Það mun taka mánuði að dæla öllu vatninu burt og komast að því hversu margir létu lífið, hversu margir eru slasaðir og hversu margir eru heimilislausir. Þótt New Orleans hafi fengið mesta athygli fjölmiðla að undanförnu vegna sérlega slæms ástands þar má þó ekki gleyma að Katrín rústaði borgum og bæjum í þremur ríkjum, á svæði sem er samtals meira en tvöfalt stærra Íslandi að flatarmáli. Enginn veit enn hversu margir hafa misst heimili sín eða hversu margir eru látnir og slasaðir eftir hörmungarnar. Fjölmörg ríki hafa þegar boðið fram aðstoð sína, meira að segja Kúba og Venesúela sem að öllu jöfnu vilja sem minnst hafa saman við Bandaríkin að sælda. Össur Skarphéðinsson, þingmaður Samfylkingarinnar skrifar á heimasíðu sína að hann telji að ríkisstjórnin eigi að senda myndarlegan fjárstuðning til íbúa New Orleans og líka að íhuga hvort unnt sé að senda hjálparsveit til að aðstoða við björgunar- og hjálparstörf í borginni. Björn Ingi Hrafnsson, aðstoðarmaður Halldórs Ásgrímssonar forsætisráðherra, segir utanríkisráðuneytið hafa boðið bandarískum stjórnvöldum aðstoð íslensku alþjóðabjörgunarsveitarinnar eftir að skilaboð bárust í gær í gegnum Sameinuðu þjóðirnar um að slíkar sveitir vantaði. Sveitin var því sett í viðbragðsstöðu í gær en Jón Gunnarsson, formaður Landsbjargar, segir beðið svars frá Bandaríkjamönnum um hvort þeir þiggi aðstoðina.