Fuglaflensa í rénun í Rússlandi

Fuglaflensufaraldurinn sem borist hefur um Rússland og Kasakstan undanfarin einn og hálfan mánuð virðist í rénun, að sögn yfirvalda í löndunum. Þau segja að tekist hafi að hefta útbreiðslu veirunnar, m.a. með því að setja fjölmarga bæi og býli í sóttkví. Auk þess sé farið að kólna og þá sé veiran ekki eins skæð. Rússneska öryggismálaráðuneytið greindi frá því í dag að engin ný tilfelli hefðu komið upp síðasta sólarhinginn, en á annað hundrað þúsund alifuglum hefur verið slátrað til að koma í veg fyrir útbreiðslu veikinnar. Yfirdýralæknir í Rússlandi hefur þó varað við því að fuglaflensan geti skotið upp kollinum annars staðar í heiminum næsta vor og hefur hann biðlað til Bandaríkjanna og ríkja Evrópu um samstarf um að fylgjast með ferðum farfugla þar sem þeir eru taldir geta borið veiruna frá Rússlandi.