Rjúfa innsigli á kjarnorkuveri

Íranar hafa rofið innsigli á kjarnorkuveri þar sem þeir geta auðgað úran sem nota má til vopnaframleiðslu. Mikil spenna hefur myndast vegna málsins og standa yfir neyðarfundir hjá Alþjóðakjarnorkumálastofnuninni. Meðal þeirra úrræða sem Alþjóðakjarnorkumálastofnunin hefur er að vísa málinu til Öryggisráðs Sameinuðu þjóðanna sem gæti sett viðskiptabann á Íran. Þó að ólíklegt þyki að það verði gert þegar í stað er ljóst að vísun til Öryggisráðsins myndi ekki draga úr spennunni. Íranar segja nauðsynlegt að hefja vinnslu í kjarnorkuveri við bæinn Isfahan til að framleiða raforku en lengi hefur leikið grunur á að í raun fari fram ólöglegur undirbúningur að smíði kjarnavopna. Íranar hafa farið mjög leynt með kjarnorkuáætlun sína sem hefur enn frekar aukið á grunsemdir um að áætlanir þeirra samrýmdust ekki alþjóðalögum. Uppljóstrarar hafa greint frá því að Íranar eigi nú þegar nægt hráefni til að geta innan skamms búið til töluvert magn slíkra vopna. Aðrir sérfræðingar telja í það minnsta áratug þurfa til að Íranar búi yfir nægilegri kunnáttu og hráefni. Engu að síður vekja aðgerðir þeirra enga hrifningu hjá alþjóðasamfélaginu. Evrópubandalagið með Þjóðverja, Frakka og Breta í broddi fylkingar hefur reynt að semja við Írana og bjóða þeim ívilnanir en nýjasta tilboði hópsins vísuðu Íranar frá á laugardaginn var með þeim orðum að það væri móðgun við írönsku þjóðina. Nýkjörinn forseti landsins, harðlínumaðurinn Mahmoud Ahmedinejad, ritaði þó Kofi Annan bréf í gær og kvaðst þar hafa nýjar hugmyndir fram að færa. Orð hans hafa vekið grun um að hugsanlega reyni Íranar með þessum hætti að fjárkúga Vesturlönd og vilji fá mikið meira fyrir að hætta við kjarnorkuáætlun sína en Evrópusambandsþjóðirnar buðu.