Kvæntist móður sinni

Íraskur flóttamaður með dvalarleyfi í Noregi kvæntist móður sinni í örvæntingarfullri viðleitni við að fá fjölskyldu sína til sín. Maðurinn fluttist til Lilleström fyrir nokkrum árum og í samræmi við lög um aðstoð við flóttamenn til að sameinast fjölskyldum sínum á ný sótti hann um að kona sín og börn fengju líka að flytjast til landsins. Að sögn Aftenposten tóku tvær grímur hins vegar að renna á lögregluna þegar þeir sáu að konan virtist mun eldri en maðurinn á meðan börnin voru á líkum aldri og hann. DNA-rannsókn leiddi í ljós að hjónakornin voru í raun mæðgin og hin meintu börn voru systkin mannsins. Þau eiga nú fangelsisvist yfir höfði sér.