Edward Heath látinn

Edward Heath, fyrrverandi forsætisráðherra Bretlands, lést í gær áttatíu og níu ára að aldri. Hann var Íslendingum vel kunnur enda forsætisráðherra þegar annað þorskastríðið stóð. Heaths verður líkast til helst minnst fyrir að hafa leitt Bretland inn í Evrópusambandið 1973. Þegar hann kom til valda 1970 lofaði hann þögulli uppreisn til að binda enda á þá hnignun sem einkennt hafði breskt þjóðlíf frá lokum seinni heimsstyrjaldarinnar. Honum gekk ekki jafn vel við þann starfa og hann vonaði sjálfur, þar sem verkalýðshreyfingin kom í raun fyrir margar helstu breytingarnar sem hann vildi knýja fram. Hér á landi muna ugglaust margir eftir aðkomu hans að þorskastríðinu árið 1972, þegar Íslendingar færðu fiskveiðilandhelgi sína út í fimmtíu mílur. Heath tapaði fyrir Verkamannaflokknum eftir átök á heimavelli og svo aftur þegar leiðtogi Verkamannaflokksins boðaði til þingkosninga á undan áætlun. Á meðan Heath var formaður Íhaldsflokksins tapaði hann því alls þrisvar fyrir Verkamönnum og var að lokum bolað frá völdum eftir uppreisn innan flokksins og við tók Margaret Thatcher. Heath sættist aldrei við Thatcher og gagnrýndi hana oft harðlega úr lávarðadeildinni. Hann var aðlaður árið 1992 og hafði þá náð langt, miðað við að hann var ekki af ríkum ættum.