5 mánaða vopnahléi lokið

Ariel Sharon, forsætisráðherra Ísraels, segir herinn mega beita öllum brögðum til að koma herskáum Palestínumönnum frá. Það sé nauðsynlegt ef friður eigi að nást. Fimm mánaða vopnahléi er því lokið. Ísraelskir hermenn skutu palestínskan byssumann til bana þegar hann reyndi að komast ásamt öðrum manni inn í landnemabyggð gyðinga í Netzarim, nærri Gaza-borg, í dag. Atvikið átti sér stað þegar mennirnir nálguðust landnemabyggðina og neituðu að segja til nafns við hermenn sem stóðu þar vörð. Allt að tíu Palestínumenn hafa látið lífið á Gaza og á Vesturbakkanum eftir loftárásir ísraelska hersins á svæðið undanfarna tvo daga. Ariel Sharon, forsætisráðherra Ísraels, tilkynnti í sjónvarpsviðtali að hann hefði skipað hernum að gera allar nauðsynlegar ráðstafanir gegn palestínskum hryðjuverkasamtökum og engar takmarkanir væru á skipununum til hersins. Mikilvægt væri að koma herskáum hryðjuverkamönnum Palestínumanna úr umferð, ef friður ætti að nást á svæðinu. Fjórir þeirra sem létust í árásum Ísraela voru herskáir meðlimir úr Hamas-samtökunum. Þá féllu tveir óbreyttir borgarar og 25 særðust í átökum Hamas og palestínsku lögreglunnar á Gaza um helgina. Átökin brutust út er lögreglumennirnir leituðu manna sem stóðu á bak við flugskeytaárásir á byggðir Ísraela en ísraelsk kona lést í einni af árásunum. Palestínumenn létu þó ekki sitt eftir liggja og skutu nokkrum flugskeytum yfir landamæri Gaza-svæðisins og Ísraels í fyrrinótt. Mikil ólga ríkir á svæðinu og er þolinmæðin gagnvart óvininum lítil. Aðeins er um mánuður þar til brottflutningur Ísraela frá Gaza á að hefjast. Condoleezza Rice, utanríkisráðherra Bandaríkjanna, mun heimsækja svæðið í vikunni en báðir aðilar segjast vilja að átökum linni. Yfirmaður palestínsku öryggissveitanna hefur meðal annars sagt að sveitirnar muni ekki hika við að koma á lögum og reglu á sjálfstjórnarsvæðunum og að flugskeytaárásir herskárra samtaka Palestínumanna verði stöðvaðar. Síðan í september árið 2000 hafa tæplega 4000 Palestínumenn fallið og eitt þúsund Ísraelsmenn í átökum ríkjanna.