Ólgan á Gaza fer vaxandi

Í odda skarst á milli palestínskra öryggissveita og skæruliða Hamas-samtakanna í Gazaborg í gær og féllu tveir unglingar í bardögunum. Þetta eru verstu átök á milli Palestínumanna í áraraðir. Upptök ólgunnar má rekja til flugskeytaárásar herskárra Palestínumanna á samyrkjubú rétt við landamærin á Gaza á fimmtudaginn sem kostaði ísraelska konu lífið. Bæði Hamas og Al Aqsa samtökin lýstu yfir ábyrgð á því tilræði, að því er virðist til að hefna fyrir aftöku ísraelskra hermanna á Palestínumanni, tengdum Al Aqsa samtökunum. Í gærmorgun réðust palestínskar öryggissveitir inn í Zeitoun-hverfið í Gaza-borg til að klófesta skæruliða sem taldir voru standa fyrir árásunum í fyrrdag. Þær mættu hins vegar mikilli mótspyrnu uppreisnarmanna sem kveiktu í lögreglustöð og nokkrum herjeppum. Tveir táningspiltar, 13 og 17 ára, biðu bana í átökunum og 25 særðust, þar af sex lögreglumenn. Síðar um daginn gerði ísraelski flugherinn loftárás á yfirgefið hús sem skæruliðar höfðu lagt undir sig og fórst einn þeirra í árásinni. Aðgerðir palestínskra yfirvalda benda til stefnubreytingar en þau hafa legið undir ámæli fyrir að taka ekki uppreisnarmenn nógu föstum tökum. Loftárásir Ísraela þykja á hinn bóginn vísbending um að þeir séu að missa trúna á Mahmoud Abbas, forseta palestínsku heimastjórnarinnar og kjósi að grípa til eigin ráða. Í það minnsta virðist vopnahléið frá því í febrúar standa á brauðfótum.