Tekinn af lífi án dóms og laga

Ísraelskir hermenn réðust í gær inn á heimili breskrar blaðakonu í bænum Nablus á Vesturbakkanum og skutu þar til bana, Mohammed Alassi, meintan palestínskan uppreisnarmann. Félagi hans var handtekinn við sama tækifæri. Formælandi hersins segir Alassi hafa verið félaga í samtökunum Heilagt stríð og viðriðinn sjálfmorðssprengjuárás í Netanya í vikunni sem kostaði fimm mannslíf. Vinir hans þvertaka hins vegar fyrir það og segja hann hafa verið meðlim í öðrum samtökum, Al-Aqsa píslarvottasveitunum, sem hafa haldið sig til hlés undanfarna mánuði.