Meðferð á föngum ekki pyntingar

Donald Rumsfeld, varnarmálaráðherra Bandaríkjanna, leyfði niðurlægjandi yfirheyrsluaðferðir í Guantanamo-fangelsinu á Kúbu. Þetta kemur fram í dagblaðinu Washington Post í dag. Sérfræðingar á vegum hersins segja aðferðirnar ekki geta talist pyntingar. Fangi í Guantanamo var neyddur til að setja nærbuxur af kvenmanni á höfuð sér á meðan hundur urraði á hann. Þetta kemur fram í nýlegri skýrslu bandaríska hersins, um meint harðræði í yfirheyrslum yfir föngum í fangelsinu. Donald Rumsfeld, varnarmálaráðherra Bandaríkjanna, gaf leyfi fyrir aðferðunum að því er bandaríska dagblaðsins Washington Post heldur fram í dag. Þá kemur þar fram að Rumsfeld hafi gefið leyfi fyrir aðferðunum við yfirheyrslur yfir Mohamed Qahtani, einum af þeim 20 hryðjuverkamönnum, sem taldir eru eiga aðild að hryðjuverkaárásunum á Tvíburaturnana í New York þann 11. september árið 2001. Samkvæmt heimildum blaðsins grundvölluðust aðferðirnar á því að brjóta niður þá fanga í fangabúðunum sem neituðu að tala. Sérfræðingar á vegum hersins, sem hafa rannsakað ásakanir um meint harðræði segja aðferðirnar ágengar en að þær geti ekki talist vera pyntingar. Í Washington Post segir, að niðurstöður skýrslunnar bendi til að þær harkalegu aðferðir sem fyrst birtust á myndum sem hermenn tóku af föngum við yfirheyrslur í Abu Ghraib fangelsinu voru ekki uppfinning lítils hóps hermanna heldur hafi þær verið notaðar við yfirheyrslur áður en her Bandaríkjamanna réðst inn í landið. Þá styðji niðurstöður skýrslunnar þær ásakanir að hermenn á vegum bandaríska hersins hafi talið það viðurkenndar aðferðir að beita fanga niðurlægjandi harðræði við yfirheyrslur.