Umkringdu barnaskóla

Stigamenn stráfelldu 76 manns í þorpi í norðurhluta Keníu í fyrradag. Talið er að ættbálkaerjur séu orsök ódæðanna. Íbúar þorpsins Turbi í Norður-Keníu áttu sér einskis ills von á þriðjudaginn þegar hundruð stigamanna umkringdu barnaskóla bæjarins og nálæg hús og hófu skothríð. Þegar yfir lauk lágu 76 manns í valnum, þar af 22 börn sem voru á leiðinni í skólann. Lík lágu eins og hráviði á götum bæjarins, mörg þeirra í skólabúningum. Í Turbi býr einkum fólk af Gabra-ættbálknum. Talið er að illvirkjarnir hafi verið úr Borana-ættbálknum sem býr á eþíópísku landamærunum en þessir flokkar hafa lengi deilt um vatnsból og bithaga á svæðinu. Vera má að drápin hafi verið framin í hefndarskyni vegna fyrri árása Gabra-manna. Þegar morðingjarnir höfðu lokið sér af tóku þeir með sér nautgripi, geitur og úlfalda í eigu bæjarbúa. Lögregla leitar þeirra nú ákaft. Að vonum ríkir mikill ótti á meðal bæjarbúa í Turbi en margir þeirra flýðu til nágrannaborgarinnar Marsabit í kjölfar drápanna.