Aoun kom sá og sigraði

Þriðja og næstsíðasta umferð þingkosninganna í Líbanon var haldin í fyrradag. Flokkum maroníta og sjía vegnaði ágætlega en kosið var í austur- og miðhluta landsins. Flokkar sem börðust gegn áhrifum Sýrlandsstjórnar eru með sterk ítök á þessu landsvæði en fyrir fram var búist við því að þeir færu með öruggan sigur af hólmi. Helst bar til tíðinda gott gengi flokks Michels Aoun, eins forsvarsmanna kristinna maroníta og fyrrum byltingarleiðtoga en hann snéri aftur úr útlegð fyrir stuttu. Michel Aoun barðist á sínum tíma gegn áhrifum Sýrlendinga og ber kosningabarátta hans þess mjög merki nú. Flokkur hans er þó ekki í bandalagi við and-sýrlenska flokka súnnía. Sökum þess hve fylgið dreifðist á þá heldur núverandi stjórn meirihluta sínum í þessum hluta landsins. Flokkur Aouns náði fjórtán þingsætum sem telst sigur þar á bæ en helsta baráttumál hans var að berjast gegn spillingu. Í Beqa-dalnum fékk framboð Hizbollah og Amal yfirburðakosningu og jók þar með enn við þingsætafjölda sinn. Framboðið er heldur hlynnt Sýrlendingum þannig að ljóst er að andstæður eru að skerpast í landinu. Fjórði og síðasti dagur kosninganna er næstkomandi sunnudag.