Mikilvægt að halda rétt á spilunum

Tryggvi Þór Herbertsson, forstöðumaður Hagfræðistofnunar HÍ, segir að niðurfelling skulda hjá fátækustu ríkjum heims hafi gífurleg áhrif. "Þessi lönd bera mikinn vaxtakostnað og þar af leiðandi hafa tekjur þessara landa fyrst og fremst farið í fjármagnskostnað. Þau hafa ekki náð neinum möguleika á hagvexti, meðal annars vegna þess, en auðvitað geta verið fleiri þættir sem þar hafa áhrif," segir Tryggvi. Hann segir mikilvægt að þessum löndum sé hjálpað að komast af stað eftir breytingarnar. "Það er betur heima setið en af stað farið ef ekki er haldið rétt á spilunum. Það þarf auðvitað að sjá hvers konar stjórnarhættir eru í þessum löndum og svo framvegis. Langtímaáhrif af þessu gætu reyndar verið þau að löndin fengju ekki lán seinna meir, þannig að það þarf að huga að mörgum þáttum ef þetta verður að veruleika," segir Tryggvi. Ísland á aðild að Alþjóðagjaldeyrissjóðnum og við niðurfellingu skuldanna minnkar virði sjóðsins en Tryggvi segir það vera mjög óveruleg áhrif fyrir Ísland enda hafi aðstoð Íslendinga við fátækustu ríki heims einkum verið bundin við matvælaaðstoð og annað í þá veru. Sighvatur Björgvinsson, framkvæmdastjóri Þróunarsamvinnustofnunar Íslands, fagnar ákvörðun um niðurfellingu skulda. Hann segir að framkvæmdastjórum þróunarstofnana Norðurlandanna hafi fyrir nokkru verið kynntar hugmyndir um alþjóðlega lánastofnun sem ríki heims myndu eiga aðild að, en hann sé ekki hrifinn af slíkum hugmyndum. "Ég tel að með slíku sé verið að færa vandann til þeirra ríkisstjórna sem taka við í framtíðinni. Eina leiðin til að afnema fátækt er að auka hjálpar- og uppbyggingarstarf með beinun fjárframlögum og það er sú leið sem ég vil fara," segir Sighvatur.