Deilt um greiðslur til ESB

Eins og stjórnarskrárkreppan sé ekki nóg, deila leiðtogar Evrópusambandsins líka innbyrðis um hve mikið hver eigi að borga til sambandsins. Stjórnarskrá Evrópusambandsins er dauð, lengi lifi stjórnarskráin! Það er hálfpartinn það sem evrópskir stjórnmálaleiðtogar segja þessi dægrin. Ljóst er að ekki er hægt að fá stjórnarsáttmála sambandsins samþykktan sem stendur en enginn veit hvernig er hægt að snúa sig út úr þeim vanda. Orð Jacques Chiracs Frakklandsforseta í dag voru dæmigerð fyrir það sem heyra má. Hann sagði að sættir yrðu að takast milli áætlunar ESB og Evrópubúa. Endurheimta þyrfti traust Evrópubúa á sambandinu og láta þá fá tiltrú á þessu frábæra verkefni sem væri í raun það eina sem dygði til að tryggja frið, lýðræði og mannréttindi á gervöllu meginlandinu. Til að bæta gráu ofan á svart er nú deilt um fjármál sambandsins og Tony Blair vogaði sér að stinga upp á því að niðurgreiðslur til bænda yrðu endurskoðaðar. Hætt er við því að Chirac lítist ekki vel á það enda hljóta franskir bændur dágóðan hluta niðurgreiðslnanna. Blair vill raunar allsherjarendurskoðun. Hann sagði í dag að það væri afar mikilvægt að ná samkomulagi um greiðslur til sambandsins og það yrði að vera réttlátt fyrir öll Evrópusambandsríkin, þar með talin hin nýju ríki sambandsins. Óréttlátt væri að Bretland greiddi mun hærra framlag en önnur lönd, en um þetta snerust samningaviðræður. Ekki væri hægt að útiloka sumt og segja að það verði ekki tekið til greina. Miðað við þetta er því hætt við að kreppa Evrópusambandsins minnki ekki á næstunni.