Segist læsa prestinn úti

"Við höfum fram að þessu ekki haft löngun til að skipta um skrár í skrifstofum í safnaðarheimilinu en teljum okkur ekki hafa neina skyldu til að útvega sóknarpresti vinnuaðstöðu," segir Matthías G. Pétursson, formaður sóknarnefndar Garðasóknar en Hans Markús Hafsteinsson, sóknarprestur í Garðabæ, ætlar að virða að vettugi öll fyrirmæli biskups um tilflutning í starfi ef til þeirra kemur. Þetta kemur fram í bréfi sem Sveinn Andri Sveinsson, lögmaður Hans Markúsar, hefur ritað biskupi Íslands en deilur hafa að undanförnu staðið í prestakallinu vegna ágreinings milli sóknarprestsins og formanns og varaformanns sóknarnefndarinnar. Matthías segir Hans Markús vera búinn að mála sig út í horn. "Það kemur skýrt fram í reglum áfrýjunarnefndarinnar að biskupi ber að fara eftir þeim og færa hann til í starfi. Ef því verður haldið fram að áfrýjunarnefndin hafi ekki völd í málinu hlýtur biskup að fá umboð frá ráðherra til að hlutast til um málið. Ef hann neitar að verða við þeim tilmælum verðum við að grípa til aðgerða,"segir Matthías. Sveinn Andri Sveinsson, lögmaður Hans Markúsar segir að samkvæmt lögum hafi áfrýjunarnefndin aðeins völd þar sem hið kirkjulega vald nær til. "Hans Markús er skipaður af ráðherra og aðeins hann getur leyst hann frá störfum. Þá eru engar málefnalegar ástæður fyrir því að aðalsafnaðarfundur hafi ekki enn verið haldinn. Því hefur verið haldið fram af starfsmanni biskupsstofu að ástæða þess sé málarekstur fyrir áfrýjunarnefndinni en svo er ekki því málsaðilar þess máls eru einstaklingar en ekki sóknarnefndin. Svo er það enn og málsaðilum er ekki skipt út eins og í fótboltaleik. Þetta mál er dæmi um einelti af verstu gerð," segir Sveinn Andri.