Fer hægt en örugglega af stað

"Sumarið fer hægt en örugglega af stað," segir Páll Þór Ármann, framkvæmdastjóri Stangaveiðifélags Reykjavíkur. Páll segir að það hafi samtals veiðst tólf laxar í Norðurá sem opnaði nú 1. júní og Blanda sem opnaði 5. júní hafi líka farið ágætlega af stað og þar hafi sextán laxar veiðst hingað til. Aðspurður hvort menn séu bjartsýnir á gott veiðisumar segir Páll: "Já, þó það fari frekar hægt af stað þá eru menn mjög bjartsýnir. Það var stórstreymt núna 6. júní og svo bætist rigningin við þannig að það hefur bæst í árnar. Þegar það fer að sjatna núna þá fer þetta að ganga."