Hvít-Rússar á atkvæðaveiðum

Það er ekkert til sparað við að kynna framlag Hvíta-Rússlands til Evrópusöngvakeppninnar í ár. Söngkonan Angelica er á ferð um Evrópu í einkaþotu ásamt fríðu föruneyti og kynnti hún lagið sitt á Nasa við Austurvöll í dag. Hún hitti Selmu og segir íslenska lagið mjög gott. Það hefði mátt halda að forseti Hvíta-Rússlands væri kominn til Íslands frekar en söngkonan Angelica Agurbash, sem er fulltrúi landsins í Evróvisjón í ár. Slíkt var tilstandið í kringum hana, Benzarnir í röðum og öryggisgæsla talsverð. Angelica er 34 ára, gift þriggja barna móðir sem býr í Moskvu í Rússlandi. Hún ólst upp við mikla fátækt en er nú stórstjarna í heimalandi sínu, Hvíta-Rússlandi, og hefur komið fram sem bæði söngkona, dansari og leikkona. Hún kom ásamt fríðu föruneyti með einkaþotu til Íslands og kynnti famlag Hvít-Rússa, Love Me Tonight, á Nasa, en Ísland er 17. viðkomustaðurinn af 24 í umfangsmikilli Evrópukynningu á laginu. Ferðalagið kostar milljónir króna og segir söngkonan móttökurnar hafa verið frábærar. Hún segir kynninguna mikilvæga fyrir Evróvisjónkeppnina og þá þykir henni einnig mikilvægt að kynna sjálfa sig og eignast nýja vini í Evrópu. Angelica segir ferðalagið að undanförnu hafa tekið á enda heimsæki hópurinn nýtt land nánast á hverjum degi. Hún segist hlakka mikið til þess að syngja í Kænugarði í Úkraínu í næsta mánuði. Söngkonan snæddi hádegisverð með Selmu, fulltrúa Íslands í Kænugarði, og segir þær orðnar ágætisvinkonur. En hvað finnst henni um íslenska lagið? Angelica segir það góðan valkost. Hún viti að Selma hafi tekið þátt í Evróvisjón árið 1999 og þá náð öðru sæti sem sé frábær árangur. Þær hafi hist í dag og Selma sé frábær kona og hún kunni mjög vel við hana og lagið hennar og hún óski henni og þjóðinni góðs gengis í Kænugarði. Með komu sinni til Íslands fetar Angelica í fótspor hinnar úkraínsku Ruslönu sem kom til Íslands í fyrra og sigraði síðan í söngvakeppni evrópskra sjónvarpsstöðva. Hvort Angelica verður jafnheppin og hún kemur í ljós í Kænugarði 21. maí næstkomandi.