Nemendur hýstir í köldum gámum

Sex fjölskyldur og fjórir einstaklingar við Viðskiptaháskólann á Bifröst búa í tíu svokölluðum húsnæðiseiningum á skólasvæðinu sökum húsnæðisskorts við skólann. Nemendurnir eru ósáttir við aðstæður og segja þessar einingar vera gáma sem séu kaldir og leki auk þess sem þeir telja húsaleiguna of háa. Ennfremur reynist íbúum húsnæðiseininganna erfitt að sækja um húsaleigubætur vegna þess að einingarnar eru ekki samþykktar sem íbúðahúsnæði. Nemandi, sem ekki vildi láta nafn síns getið, sagði í samtali við Fréttablaðið að fólk í gámunum borgaði rúmar eitt þúsund krónur á hvern fermetra sem væri nánast sama leiga og í miðbæ Reykjavíkur. Þó eru nemendurnir sammála um að á Bifröst sé gott að búa en það vegi ekki þungt á móti því sem þau hafi gengið í gegnum. Þórir Páll Guðjónsson, framkvæmdastjóri Nemendagarðanna, vill kalla þessi húsnæði einingar og segir eðlilegar skýringar vera á þessu máli. "Borgarbyggð hefur neitað að greiða húsaleigubætur til fólks í þessum einingum því að þær eru ekki með svokallað fasta-númer," segir Þórir Páll. Fjöldi nemenda skólans býr utan nemendagarðanna og hafast við í sumarbústöðum og öðru leiguhúsnæði. "Borgarbyggð hefur samþykkt bústaðina sem nemendagarða og ætti Borgarbyggð að samþykkja þessi hús sem slík þó svo að það hafi ekki verið gert," segir Þórir Páll. Hann bendir á að fjölgunin í skólanum sé svo ör að skólayfirvöld hafi ekki undan að byggja húsnæði. Samkvæmt Þóri Páli er beðið eftir að lokið verði við lóðarteikningar af svæðinu þar sem íbúðareiningar eru, en þá verði auðveldara fyrir nemendur að sækja um húsaleigubætur. Þórir Páll vísar á bug gagnrýni nemenda um að húsaleigan sé of há og bendir á að leigan á þriggja herbergja íbúðum sé um 70 þúsund en leigan á einingunum aðeins 60 þúsund krónur. "Kvartanir vegna hitaleysis komu í kjölfar vandamála sem við glímdum við vegna hitaveitunnar en það hefur verið lagað," segir Þórir Páll.