Lágmarkslaunin fara í 113 þúsund

Laun félaga í SFR - stéttarfélagi í almannaþágu hækka um átján prósent samkvæmt nýgerðum samningi við fjármálaráðuneytið. Samningurinn verður undirritaður næsta miðvikudag og mun gilda afturvirkt frá 1. febrúar síðastliðnum til 30. apríl 2008. Jens Andrésson formaður SFR var nokkuð sáttur við samkomulagið sem náðist klukkan hálf sex í gærmorgun. Með samningnum er tryggt að lágmarkslaun fari ekki undir 113 þúsund krónur á mánuði eftir 1. maí 2006 og einnig felur hann í sér hærri orlofsuppbót. Þar sem nýi samningurinn náði ekki að leysa þann gamla af hólmi á tilsettum tíma fær launafólk 20 þúsund króna eingreiðslu. Í svokallaðri HASLA-könnun sem félagsvísindadeild H.í. gerði fyrir heildarsamtök opinberra starfsmanna kom fram "óútskýranlegur" launamunur kynjanna og nú stendur til að gera úttekt á málinu í samvinnu við jafnréttisráð til að eyða því óútskýranlega og bregðast svo við því með úrbótum í maí 2006 og svo endurskoðun og nánari úrbótum ári síðar.