Tugmilljóna hækkun milli ára

"Þetta eru tilboð upp á fimmtíu prósenta hækkun frá því sem nú er," segir Ragnar Gunnlaugsson á Bakka, formaður veiðifélagsins sem á Víðidalsá, um tilboðin sem bárust í leigu árinnar næsta ár. Gera má ráð fyrir að tilboðin nú hljómi upp á um fimmtíu milljónir króna. Ragnar vildi ekki nefna ákveðna tölu, sagði að stjórnin ætti eftir að leggjast yfir tilboðin og jafnvel fá einhverjar skýringar á þeim, en sagði þó að þessi tala væri ekki fjarri lagi. Ragnar segir að hækkunin komi svo sem ekki á óvart. Þeir sem hafa ána á leigu hafi boðið í áframhaldandi leigu árinnar í janúar og segir Ragnar það tilboð hafa slagað upp í þau tilboð sem hafi borist núna. "Menn hafa hækkað sig fremur en hitt." Þegar Ragnar er inntur eftir ástæðum fyrir hærri tilboðum vísar hann til þess að veiði hafi verið mjög góð síðasta sumar. "Hér hafa verið mörg léleg sumur undanfarið en margar húnvetnsku árnar komu vel út síðasta sumar," segir hann.