Færri sóttu hjálp vegna nauðgana

Alls komu 104 á neyðarmóttöku Landspítala - háskólasjúkrahúss og leituðu aðstoðar vegna nauðgunar á síðasta ári. Þar af voru tveir karlmenn. Eyrún Björg Jónsdóttir, umsjónarhjúkrunarfræðingur Neyðarmóttökunnar, segir komur færri en árin tvö á undan, þegar þær hafi verið 119 hvort ár. Alls hafi 1.155 sótt til móttökunnar frá opnun hennar árið 1993 til síðustu áramóta. Yngsta fórnarlambið var 12 ára og það elsta 78 ára. Eyrún segir erfitt að geta til um ástæðu fækkunarinnar en hugsanlega megi rekja hana til umræðu um skipulagsbreytingu, uppsagnir starfsfólks og flutning deildarinnar sem til stóð í fyrra en ekkert varð af. "Við vitum ekki hvort öll þessi umræða við neyðarmóttökuna hefur orðið til þess að fólk hafi haldið að búið væri að leggja hana af á tímabili," segir Eyrún og bendir á að svo geti verið því neyðarmóttakan sé ekki mikið kynnt. Eyrún segir starfsfólk neyðarmóttökunnar hafa merkt að fleiri stúlkum en áður hafi verið nauðgað utandyra. Slíkt hafi þær séð áður en ekki í eins miklum mæli. Gerendur hafi jafnvel verið fleiri en tveir eða þrír. Stúlkur um fjórtán ára aldur hafi verið meðal fórnarlamba. "Er það jafnvel við aðstæður sem manneskjur eiga alls ekki von á að ráðist sé á þær," segir Eyrún: "Okkur finnst óhugnanlegt að hugsa til þess að svona strákar sem eru saman í hópi dragi stúlku afsíðis, nauðgi og fari illa með. Þeir virðast ekki þola að vera hafnað þegar stúlkan hefur sagt þeim að láta sig vera og hún vilji ekki tala við þá og ákveða þá að ráðast á hana," segir Eyrún. Þróunin virðist eins sé horft til nauðgana og annarra líkamsárása. Eyrún segir starfsfólk deildarinnar stundum verða vart við svipað mynstur nauðgana í sögum fórnarlamba. Það geti þó ekki vitað hvort sami maðurinn sé á ferð. Grunsemdir hafi stundum vaknað en starfsfólkið geti aldrei staðfest slíkt enda rannsóknir mála í höndum lögreglunnar.