10% fimm ára barna með geðröskun

Tíunda hvert fimm ára barn er með geðröskun samkvæmt nýrri íslenskri rannsókn og er þetta heldur hærra hlutfall en í nágrannalöndunum. Mun fleiri börn sýna einkenni geðraskana.  Börnum sem greind eru með hegðunar- og geðraskanir hefur fjölgað mjög á undanförnum árum og eru nú 2400 slík á skrá hjá Tryggingastofnun. Geðraskanir eru til dæmis mikill kvíði, þunglyndi eða ofvirkni. Nýlega var gerð rannsókn meðal fimm ára barna og var greint frá henni á ráðstefnu um geðraskanir barna í dag. Niðurstöðurnar eru sláandi - rúmlega tíu prósent barnanna greindust með geðröskun. Ólafur Ó. Guðmundsson, barna- og unglingageðlæknir, segir að kannski séu tölurnar aðeins í hærri kantinum, bæði miðað við aldur barnanna og önnur lönd, því verið sé að tala um geðraskanir, ekki aðeins börn sem séu með einkenni.    Ólafur segir nauðsynlegt að gera það að reglu að skima fyrir geðröskunum í fimm ára skoðun barna á heilsugæslustöðvum. Og rannsóknin beindist einnig að því að búa til hentugt greiningartæki til þess. „Nú höfum við ákveðna kortlagningu á þessum vanda og það ætti að auðvelda okkur að skipuleggja viðeigandi íhlutun,“ segir Ólafur.