Enn eitt gæluverkefnið

"Það er óþolandi að forsvarsmenn Orkuveitunnar séu sýknt og heilagt að vasast í gæluverkefnum sem borgarbúum er svo sendur reikningur fyrir," segir Guðlaugur Þór Þórðarson. Hann gagnrýnir að Orkuveita Reykjavíkur ætli sér að fjárfesta í heilsutengdri ferðaþjónustu eins og fyrir liggur. Guðlaugur bendir á að slíkur rekstur tengist með engu móti hlutverki Orkuveitunnar en fyrirtækið vinnur að því í samvinnu við einkafyrirtæki að koma meðal annars á fót baðsvæði að Nesjavöllum á borð við það sem þegar er í Bláa lóninu í Svartsengi. "Þessi rekstur er alls óskyldur starfsemi Orkuveitunar og þvert á þá stefnu sem sérstök nefnd, sem skipuð var af R-listanum, lagði til að Orkuveitan markaði sér." Alfreð Þorsteinsson, formaður OR, segir ekkert óeðlilegt við þátttöku í slíkum rekstri en bendir á að í þessu tilfelli sé ekki um fjármagn að ræða heldur fyrst og fremst land sem fyrirtækið leggur til. Guðlaugur gefur lítið fyrir það. "Þeir ætla í þennan rekstur á svipuðum forsendum og þeir gera varðandi frístundabyggðina við Úlfljótsvatn og þar stendur til að taka fullan þátt í rekstrinum ásamt einkaaðilum. Þarna er því um annað og meira en land að ræða."