Séra Hjalti verði ráðinn aftur

Foreldrar barna í Landakotsskóla skora á stjórn skólans að ráða séra Hjalta Þorkelsson aftur sem skólastjóra og veita honum fullt og óskorað umboð til að stjórna skólanum. Foreldrar lýsa yfir þungum áhyggjum af ástandinu í skólanum. Fjölmennur fundur foreldra barna í Landakotsskóla, sem haldinn var í Reykjavíkurakademíunni í gær, samþykkti yfirlýsingu til stjórnar skólans þar sem lýst er þungum áhyggjum af því ástandi sem upp er komið í skólanum. Mikil ólga hefur ríkt í skólanum eftir að séra Hjalti Þorkelsson skólastjóri sagði starfi sínu lausu í síðustu viku eftir að hafa starfað þar í 22 ár í kjölfar ákvörðunar rekstrarfélags Landakotsskóla að segja Bessí Jóhannsdóttur aðstoðarskólastjóra upp störfum. Fundur foreldra við skólann harmar sérstaklega að séra Hjalti hafi ekki séð sér fært að starfa áfram við skólann og skorar á stjórn skólans að ráða hann aftur til starfa og veita honum fullt og óskorað umboð til að stjórna skólanum þar sem það sé forsenda þess að hann haldi áfram að starfa þar. Þá er farið fram á að haldinn verði opinn fundur með stjórnendum skólans tafarlaust. Séra Hjalti telur sig ekki geta starfað með núverandi stjórn skólans vegna ágreinings um starfsaðferðir en Gunnar Örn Ólafsson, formaður rekstrarfélags Landakotsskóla, segir að fjárhagserfiðleikar skólans valdi því að ákveðið hafi verið að segja Bessí Jóhannsdóttur upp störfum.