Tíðni húðæxla hefur tvöfaldast

Foreldrum og forráðamönnum fermingarbarna hefur verið sent póstkort þar sem bent er á hætturnar sem fylgja því að ungt fólk fari í ljósabekki. Skilaboðin á kortinu eru frá Geislavörnum ríkisins, Landlæknisembættinu, Krabbameinsfélaginu og Félagi íslenskra húðlækna. Vakin er athygli á því að börn og unglingar séu næmari en aðrir fyrir skaðlegum áhrifum geislunar frá ljósabekkjum og að sól og brúnn húðlitur eftir sólböð geti verið merki um skemmdir í húðinni, sem leitt geti til ótímabærrar öldrunar húðarinnar og jafnvel til húðkrabbameins. Tekið er undir tilmæli Alþjóða heilbrigðismálastofnunarinnar um að þeir sem eru yngri en 18 ára eigi ekki að fara í ljósabekki og eru foreldrar og forráðamenn fermingarbarna eindregið hvattir til að hafa þetta í huga. Samkvæmt krabbameinsskrá Krabbameinsfélagsins greinast að meðaltali 45 manns á ári með sortuæxli í húð, 45 með önnur húðæxli og um 170 manns með svonefnd grunnfrumuæxli í húð. Undanfarinn áratug hefur tíðni húðæxla tvöfaldast hér á landi.