Hvetja fólk til að hjóla

Hundruð naktra hjólreiðamanna mótmæltu á götum London, höfuðborgar Englands, á laugardag og hvöttu fólk til að nota hjól. Tilefnið var afstaða stjórnvalda til bíla sem ganga fyrir jarðefnaeldsneyti og menga umhverfið. Hjólreiðamennirnir lögðu af stað frá Hyde Park og hjóluðu framhjá öllum helstu kennileitum borgarinnar. Fjöldinn allur af nöktum hjólreiðamönnum mótmælti einnig á götum Madrídar, höfuðborgar Spánar. Flestir mótmælendanna voru karlmenn sem klæddust engu nema skóm og báru hjálm. Skipuleggjendur mótmælanna bjuggust einnig við mótmælum í Ástralíu, Kanada, Bandaríkjunum, Írlandi, Ítalíu, Lettlandi og Ísrael en mótmælin virðast ekki hafa teygt anga sína hingað til lands.