Mannskæðustu árásir í áratug

Einn lést og fjórir slösuðust í sprengingu í miðborg Teheran í Íran í gær nokkrum klukkustundum eftir að átta létust og 36 særðust í fjórum sprengingum sem ætlaðar voru byggingum ríkisstjórnarinnar í Suðvestur-Íran. Yfirvöld segja árásarmennina vera að draga úr þátttöku almennings í forsetakosningunum á föstudag. Árásirnar voru þær mannskæðustu í Íran í meira en áratug en sprengingar hafa verið fátíðar síðan í lok stríðsins á milli Írak og Íran árið 1988. Sprengingarnar koma í kjölfar ofsafenginna mótmæla í Ahvaz, höfuðborg Khuzestan-héraðsins í Suðvestur-Íran, vegna meintra áforma um að breyta hlutfalli araba í landinu. Mótmælin hófust vegna útbreiðslu bréfs sem varaforseti Írans, Mohammad Ali Abtahi, á að hafa skrifað undir. Bréfið innihélt skipun um að færa fólk af öðru þjóðerni en arabísku til Ahvaz til að arabar væru þar í minnihluta en arabar eru þrjú prósent íbúa í Íran. Abtahi neitar að hafa skrifað bréfið.