Kröfðust lausnar Khodorkovskís

Um tvö þúsund manns mótmæltu við skrifstofur rússnesku öryggislögreglunnar í Moskvu í dag og kröfðust þess að olíujöfurinn Míkhaíl Khodorkovskí yrði látinn laus. Að þeirra mati er hann pólitískur fangi. Mikil hátíðarhöld fóru fram í Rússlandi í dag þar sem falli kommúnistastjórnarinnar árið 1991 var fagnað. Nokkrum klukkustundum áður en hátíðarhöldin áttu að hefjast varð sprenging á brautarteinum þess valdandi að farþegalest fór út af sporinu. Fimmtán slösuðust. Grunur leikur á að tsjetsjenskir uppreisnarmenn hafi verið að verki.