Ríta nálgast óðum

Fellibylurinn Ríta er í þann mund að skella á ströndum Texas og Louisiana. Hann virðist á góðri leið með að verða jafn kröftugur og jafnvel kröftugri en Katrín sem reið yfir Suðurríkin fyrir innan við mánuði með hörmulegum afleiðingum. Milljónir manna hafa yfirgefið heimili sín en enn er ekki ljóst nákvæmlega hvaða leið Ríta muni fara og hvar hún muni valda mestum skaða.   Ingólfur Bjarni Sigfússon, fréttamaður Stöðvar 2, er í Houston í Texas. Hann segist finna fyrir því sem er í vændum, hitastigið hækkar t.d. sífellt og er komið upp 38 stig og vindurinn er alltaf að aukast. Borgin er orðin hálfgerð draugaborg, nánast enginn sést á ferli og hvorki heyrist í hundum né fuglum. Tvær milljónir manna hafa þegar yfirgefið Houston, stór hluti þeirra þó fastur í umferðarteppu skammt frá borginni, og hálf milljón til viðbótar er í neyðarskýlum í nágrenninu með nægar matar- og vatnsbirgðir. Viðbrögð fólks eru merkilega yfirveguð þó greina megi alveg spennuna. Ástandið á hraðbratunum frá Houston í nótt og í dag var „bíll við bíl“ og engin hreyfing. Fjöldi bíla varð bensínlaus á leiðinni og bensínstöðvar urðu reyndar einnig uppiskroppa með bensín. Þjóðvarðliðið var sent með olíubíla á staðinn en fólk vantar eftir sem áður mat og drykk í hitanum. Ríkisstjórinn Rick Perry lét það ekki stöðva sig og hvatti fólk til þess að reyna að koma sér burt fram eftir degi. Fyrstu fórnarlömb Rítu fórust á flótta í dag. Rúta sem flutti ellilífeyrisfarþega til Dallas sprakk; fólkið var margt hvert með súrefnistanka með sér og talið er að í kjölfar vélarbilunar hafi þeir sprungið. Þó að Ríta láti til sín taka í Galveston og Houston er ástandið einna verst í New Orleans. Þar rigndi mikið í dag, rokið var talsvert og yfirborð vatns hækkaði mikið með þeim afleiðingum að flóðgarðar brustu á ný. Götur sem búið var að þurrka eru því aftur á floti. Ef öflugri hlið Rítu fer yfir New Orleans í nótt gætu afleiðingarnar orðið skelfilegar. Búist er við að Ríta gangi á land í Houston á milli 5 og 8 í fyrramálið.