Hjólför í nýföllnum snjó koma upp um þjófa

Nokkur snjór er nú víða í Danmörku en Danir reyna að láta það ekki raska ró sinni, ekki einu sinni þjófarnir sem halda áfram iðju sinni með misjöfnum árangri þó. Starfsmaður á bensínstöð í Nyköbing-Falster hafði samband við lögreglu vegna þess að slökkvitæki hafði verið stolið frá bensínstöðinni. Það reyndist lögreglunni auðvelt að hafa upp á þjófinum, sem var á hjóli og hafði skilið eftir sig slóð í nýföllnum snjónum. Lögreglan fylgdi hjólförunum og eftir um þriggja kílómetra akstur kom lögreglan af tveimur mönnum sem voru með slökkvitækið auk annars varnings sem þeir höfðu stolið.