Tyrknesk rúta sprengd upp

Fimm manns dóu í sprengjutilræði í Tyrklandi í gær en þá var rútu með ferðamönnum grandað. Talið er að Kúrdar beri ábyrgð á tilræðinu. Rútan sem sprengd var í loft upp var í bænum Kusadasi, sem er á strönd Eyjahafsins, en þangað kemur jafnan fjöldi erlendra ferðamanna á ári hverju. Fimm biðu bana, þar af einn Breti og annar Íri og fjórtán særðust. Ekki er nákvæmlega vitað um tildrög árásarinnar. Lögreglumaður segir að kona sem var farþegi í rútunni hafi haft sprengjuna innanklæða en embættismaður í héraðinu heldur því fram að sprengjunni hafi verið komið fyrir í bílnum. Enginn hefur lýst yfir ábyrgð á tilræðinu en böndin beinast að kúrdískum uppreisnarmönnum. Þeir hafa að undanförnu ráðist gegn erlendum ferðamönnum á þessum slóðum, síðast í byrjun þessa mánaðar. Hátt settur uppreisnarmaður úr röðum Kúrda hefur hins vegar fordæmt tilræðið. Tyrkneski stjórnarherinn og kúrdískir skæruliðar hafa síðustu tuttugu árin átt í harðvítugum átökum sem hafa kostað 37.000 mannslíf. Kúrdar vilja fá að stofna sjálfstjórnarhérað í austurhluta landsins.