Á annað hundrað létust

Talið er að nærfellt 130 manns hafi beðið bana í gær og níutíu slasast þegar herflugvél hrapaði á íbúðarhverfi í Teheran, höfuð­borg Írans. Vélarbilun er sögð skýringin á slysinu.

Auk tíu manna áhafnar voru 84 blaða- og fréttamenn um borð í C-130 herflugvélinni sem var á leið til borgarinnar Bandar Abbas í suðurhluta landsins.

Fljótlega eftir flugtak frá flugvellinum í Teheran virðist bilun hafa komið upp í hreyflum vélarinnar og því hrapaði hún. Áður en hún féll til jarðar rakst annar vængurinn utan í tíu hæða fjölbýlishús.

Enginn sem var um borð í vélinni komst lífs af, 34 á jörðu niðri létust og níutíu slösuðust. Lögregla og slökkvilið komu fljótt á vettvang og gekk slökkvistarf ágætlega.

Þúsundir manna söfnuðust auk þess saman á vettvangi og kom til uppþota og öngþveitis af þeim sökum. Margir viðstaddra óttuðust um ástvini sína á slysstað og varð lögregla að varna þeim vegarins sem reyndu að komast að byggingunni.

"Þetta var eins og jarðskjálfti," sagði Reza Sadeqi, kaupmaður í nágrenninu sem sá vélina hrapa. "Ég fann hitann af eldinum sem kviknaði í kjölfar slyssins. Þetta var eins og helvíti."

Mahmoud Ahmadinejad, forseti Írans, var í Sádi-Arabíu í gær en hann sendi samúðarkveðjur sínar og fullvissaði þá sem slösuðust um að um þá yrði séð. Bandarísku Lockheed-verksmiðjurnar framleiða C-130 flugvélarnar og því telja menn að vélin hafi verið frá því fyrir klerkabyltinguna 1979 þar sem grunnt hefur verið á því góða á milli Írana og Bandaríkjamanna síðan þá.