Lokuðu skóla vegna veikinda

Yfirvöld í Mississippi lokuðu í dag skóla, þar sem hópur fórnarlamba hamfaranna við suðurströnd Bandaríkjanna hafði dvalið, eftir að yfir 20 manns veiktust þar. Eftir því sem kemur fram á fréttavef CNN höfðu um 400 manns hafst þar við síðan á mánudag þegar fellibylurinn reið yfir. Rafmagns- og vatnslaust var í skólanum framan af vikunni en vatn kom aftur á á föstudaginn. Yfirvöld höfðu varað fólk við því að vatnið gæti verið mengað en svo virðist sem einhverjir hafi virt þær viðvaranir að vettugi og veikst í kjölfarið. Að sögn lækna var fólkið líklega með blóðkreppusótt.