Stríðsherra dæmdur fyrir pyntingar

Breskur dómstóll hefur fundið afganskan stríðsherra sekan um pyntingar og gíslatöku sem áttu sér stað í útjaðri Kabúl, höfuðborgar Afganistans, á árunum upp úr 1990. Faryadi Sarwar Zardad stýrði einkaher sínum nærri afgönsku höfuðborginni á árunum eftir að herir gömlu Sovétríkjanna fóru frá Afganistan. Fyrir sjö árum fluttist hann til Bretlands og komst þangað inn á fölskum skilríkjum. Hann rak pítsustað í London þar til hann var handtekinn og ákærður. "Hann og hermenn hans vildu skapa andrúmsloft skelfingar. Hann vildi ávinna sér orðspor fyrir grimmd og miskunnarleysi við vegatálma sína," sagði James Lewis saksóknari. Refsing verður ákvörðuð í dag.