Lyfsalar sinna ekki upplýsingaskyldu

Örfáir lyfsalar virðast upplýsa viðskiptavini sína um ódýrari samheitalyf sem geta lækkað lyfjakostnað þeirra, að því er fram kemur í könnun sem verðlagseftirlit Alþýðusambands Íslands hefur gert á þróun lyfjaverðs.

Eftirlitið bendir á að samkvæmt gildandi reglugerð sé lyfsölum skylt að upplýsa neytendur um val á milli samsvarandi samheitalyfja sé verðmunur þeirra meiri en fimm prósent.

Jafnframt þessu eru niðurstöður verðlagseftirlitsins þær, að lækkun á lyfjaverði skili sér engan veginn nægilega vel til neytenda. Samkvæmt samningum sem heilbrigðisyfirvöld gerðu í fyrra og í ár við lyfjaheildsala og smásala á lyfjaverð að lækka í áföngum fram í september 2006.

Þá á það að verða sambærilegt við það sem er á hinum Norðurlöndunum. Samkvæmt könnun verðlagseftirlitsins á tveimur lyfjategundum lækkaði önnur þeirra, bólgueyðandi lyfið Voltaren Rapid, um ríflega sjö prósent en meðalafsláttur apótekanna af hluta sjúklings minnkaði jafnframt úr 7,5 prósentum í 6 prósent.

Hin tegundin, mígrenilyfið Imigran, hækkaði aftur á móti um tæp fimm prósent.

Þessar verðbreytingar urðu á tímabilinu 20. apríl til 1. nóvember. Verðlagseftirlitið segir "óásættanlegt að þeir samningar sem gerðir hafi verið á lyfjakostnaði skili sér ekki betur í lægra lyfjaverði til neytenda".

Hvetur það neytendur til að spyrjast fyrir hjá læknum og lyfsölum um hvort til séu ódýrari samheitalyf og lækka þar með lyfjakostnað sinn.