Stjórnleysi og óöld í miklum hita

Algert stjórnleysi og óöld virðist ríkja í New Orleans fimm dögum eftir að fellibylurinn Katrín lagði borgina í rúst. Glæpalýður myrðir, stelur og nauðgar og íbúar híma enn á húsþökum matar- og vatnslausir, í meira en 30 stiga hita. Efnaverksmiðja á eystri bakka Mississippi-fljóts sprakk um hálffimmleytið í nótt að staðartíma í New Orleans og skók hverfin í kring. Það var ekki á ástandið bætandi. Algert stjórnleysi hefur ríkt í borginni undanfarna daga og bera lögreglumenn að jafnvel í svokölluðum björgunarmiðstöðvum, þar sem reyndar er litla sem enga aðstoð að fá, hafi glæpamenn vaðið uppi, myrt fólk og nauðgað konum, stolið og skemmt án þess að laganna verðir fengju við nokkuð ráðið. Verið er að senda þúsundir þjóðvarðliða á staðinn til að ná tökum á borginni á ný en það er ef til vill nokkuð seint í rassinn gripið. Við bætist að fjölmargir lögreglumenn hafa hreinlega neitað að starfa og látið sig hverfa. Henry Whitehorn, aðstoðaryfirlögregluþjónn í New Orleans, segir að þeir sem hafi sagt upp hafi sagt að þeir hafi tapað öllu og finnist það ekki þess virði að snúa aftur og verða fyrir skothríð frá ræningjum og glata líftórunni til viðbótar við allt annað sem þeir hafa misst. Borgarstjórinn hefur sent út eitt allsherjarneyðarkall og bendir á að sumir séu einfaldlega að stela úr búðunum til þess að lifa af - til að ná sér í vatn, mat, bleyjur handa ungabörnum og svo framvegis. Kathleen Blanco, ríkisstjóri Louisiana, sagði glæpamennina ekki verða tekna neinum vettlingatökum. Liðsmenn hersveita kynnu að skjóta og drepa og þeir vildu fyrir alla muni gera það ef nauðsyn krefði. Hún byggist við að þeir gerðu það. Sjúkrahúsin eru rafmagns- og lyfjalaus og útkeyrt starfsfólkið hefur sagt að þeir veikustu séu nú látnir deyja drottni sínum. Þessir sjúklingar voru færðir upp á þak þar sem búið var að lofa því að þyrla kæmi að ná í þá, sem aldrei kom. Örvæntingin er gríðarleg. John Rhinehart, stjórnandi Charity-sjúkrahússins, sagðist velta fyrir sér hvort stjórnvöld hefðu meiri áhyggjur af gripdeildunum en fólkinum sem væri við dauðans dyr á sjúkrahúsunum. Kathleen Blanco ríkisstjóri sagði marga þjást og það væri átakalegt. Allir hjálparliðarnir sem hún hefði hitt hefðu verið gráti nær. Fullorðnir menn grétu. Tugþúsundir flóttamanna hafa þegar verið fluttar frá borginni, einkum til Houston í Texas. Þeir fólksflutningar ganga þó hægt, að einhverju leyti vegna þess að sumir bílstjóranna þora hreinlega ekki inn í borgina af ótta við að glæpamenn ráðist á þá.