Fats er fundinn

Ryþmablússöngvarinn Fats Domino er kominn í leitirnar en hans hafði verið saknað eftir að fellibylurinn Katrín gekk yfir sunnanverð Bandaríkin. Margir listamenn búa í New Orleans og þeirra á meðal er hinn 77 ára gamli Fats Domino, sem gerði garðinn frægan í árdaga rokksins. Eftir að óveðrið var um garð gengið lýsti umboðsmaður Dominos því yfir að hann hefði ekkert heyrt frá honum í nokkra daga. Í fyrrakvöld greindi Karen Domino White, dóttir kappans, frá því að hún hefði séð ljósmyndir af björgun föður síns og virtist ekkert ama að honum. "Okkur er mjög létt," sagði White í samtali við blaðamenn.