64 létust í flóði í Shalan í Kína

Nú er ljóst að 62 börn og tveir fullorðnir létu lífið þegar flóðbylgja skall á barnaskóla í norðaustur Kína í dag. Frá þessu greinir Xinhua-fréttastofan. Flóðbylgjunni fylgdi skriða sem æddi í gegnum bæinn Shalan í Heilongjiang-héraði þar sem skólinn er. Dýpt vatnselgsins var allt að tveir metrar og segja vitni á staðnum að eins metra djúpt vatn sé í nánast öllum bænum. Alls voru rúmlega 350 börn á aldrinum 6-14 ára í skólanum þegar flóðbylgjan skall á honum og segja kínverskir fjölmiðlar að yngstu börnin hafi átt litla möguleika þegar kröftug bylgjan æddi í gegnum skólann, en talið er að 23 nemendur úr yngstu tveimur bekkjunum hafi drukknað. Flóð í Kína valda árlega hundruðum dauðsfalla en síðustu viku hafa rúmlega 200 manns látist í flóðum í suðurhluta landsins og 138 þúsund þurft að yfirgefa heimili sín. Spáð er áframhaldandi rigingu í landinu og því óttast yfirvöld enn frekari hamfarir og manntjón.