Vestmannaeyjabær rekinn með halla

Reiknað er með að rekstur bæjarsjóðs Vestmannaeyjabæjar verði rúmar neikvæður um 52 milljónir á árinu 2005 samkvæmt fjárhagsáætlun Vestmanneyjarbæjar sem lagður var fyrir bæjarstjórn á fimmtudag. Taka á ný langtímalán upp á rúmar 127 milljónir, en greiða um 94 milljónir af eldri lánum. Langtímalán bæjarsjóðs munu því aukast um rúmar 33 milljónir. Samkvæmt áætlunni verður eigið fé bæjarsjóðs neikvætt um rúmar 185 milljónir í lok árs 2005. Bergur Elías Ágústsson, bæjarstjóri í Vestmannaeyjum segir að rekstur Vestmannaeyjarbæjar, líkt og sambærrilegra bæja verði þungur á næsta ári. "Það vegur þungt launahækkanir og kostnaðarauki vegna ógerðra kjarasamninga. Þessu gerum við ráð fyrir en erum ekki að reyna að fegra þetta með tölum." Andrés Sigmundsson, sem situr í minnihluta bæjarstjórn, segir ljóst að vanti pólitískan kjark til að ná fram þeirri hagræðingu sem nauðsynleg er. "Það vantar hagræðingu. Það er verið að reyna að skera niður og markið sett á fimm prósent. Það er ljóst að þeir ná þessu ekki. SS flokkarnir hafa ekki dug í sér til að ná þessu fram, heldur halda áfram að safna skuldum. Þeir eru að velta vandanum á undan sér." Bergur segir að bæjarsjóður hafi verið að safna skuldum frá 1991. Á móti komi nauðsynlegar framkvæmdir. Á næsta ári verði til dæmis farið í hafnarframkvæmdir sem eru nauðsynlegar því höfnin sé líflæð Vestmanneyinga. Eignir í lok árs 2005 eiga að vera rúmar þrír milljarðar króna. Þar af eru kröfur á eigin fyrirtæki rúmur 1,5 milljarður. Bergur segir að meirihluti þess sé vegna leigugreiðslu stofnanna og fyrirtækja bæjarins, eftir að eignir voru seldar fasteignafélagi fyrr á þessu ári, til að greiða niður óhagstæðar skuldir. Skuldir, án lífeyrisskuldbindinga verða rúmir 2 milljarðar. Þar af eru skuldir við eigin fyrirtæki rúmar 960 milljónir.