Ók tvisvar á lögreglubíl

Kona á fertugsaldri, sem ók tvisvar á lögreglubíl í gærkvöldi þannig að tveir lögreglumenn meiddust og lögreglubíllinn varð óökufær, var handtekin í Breiðholti eftir miðnætti. Upphaflega hafði konan elt bíl í Kópavogi og bað ökumaður hans lögregluna um aðstoð. Þegar lögregla kom að, á bílastæði við háhýsin við Árskóga, skammt frá Mjóddinni, gaf konan allt í botn og ók tvisvar vísvitandi á lögreglubílinn og stakk svo af. Höggin voru svo mikil að líknarbelgir í lögreglubílnum blésu út, en þrátt fyrir það þurftu báðir lögreglumennirnir að fara á slysadeild, en snéru aftur til vinnu. Bíll konunnar fannst mannlaus í Breiðholti skömmu síðar, og var hún svo handtekinn laust eftir miðnætti, þegar hún ætlaði að vitja hans aftur. Hún gistir fangageymslur og er ekki vitað hvað henni gekk til.