Mannréttindaskrifstofan ein á báti

Þriðja og síðasta umræða um fjárlög næsta árs stendur nú yfir á Alþingi. Meirihluti Alþingis samþykkti fyrir nokkrum mínútum að svipta Mannréttindaskrifstofu Íslands fjárframlögum frá Alþingi. Greidd verða atkvæði um fjárlögin í dag. Fyrstur manna til að kveða sér hljóðs um atkvæðagreiðsluna um fjárlögin í morgun var Einar Már Sigurðarson Samfylkingunni. Hann sagði að ríkisstjórnin léti viðvaranir og vaxtahækkanir Seðlabankans sem vind um eyrun þjóta. Hann benti á fernt sem Samfylkingin beitti sér fyrir að yrði breytt á fjárlögum: að matarskattur yrði lækkaður í stað tekjuskatts, að ríkisstjórnin stæði við skuldbindingar sínar gagnvart öryrkjum, að Mannréttindaskrifstofa Íslands fengi áfram framlög á fjárlögum og að fjárhagur sveitarfélaganna yrði bættur. Jón Bjarnason, Vinstri - grænum, gagnrýndi stefnu ríkisstjórnarinnar og sagði flokkinn myndu sitja hjá við afgreiðslu fjárlaga. Magnús Stefánsson, formaður fjárlaganefndar, sagði að í fjárlagafrumvarpinu birtist sterk og góð staða ríkissjóðs sem leiddi til þess að kaupmáttur almennings myndi aukast. Hann sagði að niðurstaða væri góður tekjuafgangur upp á tíu milljarða króna en Magnús lauk máli sínu á því að undirstrika að aukinn agi yrði viðhafður í ríkisrekstri. Guðjón A. Kristjánsson, formaður Frjálslyndra, sagði að ríkisstjórnin hefði þegar tekið meira inn í nýjum álögum en hún skilar tilbaka í skattalækkunum. Hann sagði að afgreiðsla fjárlaganna væri á ábyrgð stjórnarþingmanna og hann sagði víst að miklar lagfæringar myndu koma fram á fjáraukalögum á næsta ári. Að þessu sögðu hófust atkvæðagreiðslur um breytingartillögur stjórnarliða og stjórnarandstöðunnar. Hingað til hafa tillögur stjórnarliða verið samþykktar og tillögur stjórnarandstöðunnar felldar. Nafnakalls var krafist um tillögu sem allir þingmenn stjórnarandstöðunnar stóðu að. Hún gengur út á að Mannréttindaskrifstofu Íslands verði áfram tryggð fjárveiting á fjárlögum en meirihlutinn hefur ákveðið að svipta Mannréttindaskrifstofuna föstu framlagi. Kristinn H Gunnarsson var eini þingmaður stjórnarliða sem tryggja vildi Mannréttindaskrifstofunni fjárframlög. Tillagan var því felld. Atkvæðagreiðslur um breytingatillögur við fjárlög standa væntanlega yfir fram eftir degi, en stefnt er að því að fjárlög verði afgreidd sem lög frá Alþingi í dag.